கொள்கை

மஞ்சள் நோட்டீசு
கொடுத்து
குடம் குலுக்கிக்
கேட்ட அம்மன்
கோவில் கும்பலுக்கு
சட்டைப்பையைத்
துழாவியப் பின்
இல்லை என சொன்ன
என்னை
அறுதியிட்டுக்
கூறமுடியாதெனினும்
தோராயமாவாவது
ஒப்புக்கொள்ளலாம்
நாத்திகன் என்று.

என் கணிதம்

ஒத்த மூக்குத்தி
ரெட்டை ஜடை
மூன்றாமாண்டு
வேதியியல்
என இருக்கிறாய்
எண்ணிலும்
என்னிலும்.

தீர்க்கம்

இன்பமாய் இனிநான்
இருக்க மாட்டேன்
துன்பமாய் இனிநான்
துவள மாட்டேன்
காதல்
வரப்போகிற தெனக்கு.

அகத்திணை
ஐந்தல்ல

ரத்தமும் ரத்தம் சார்ந்த பகுதியும்
பிணமும் பிணம் சார்ந்த பகுதியும்
வன்மமும் வன்மம் சார்ந்த பகுதியும்
சூன்யமும் சூன்யம் சார்ந்த பகுதியும்
பஞ்சமும் பஞ்சம் சார்ந்த பகுதியும்
பிணக்கும் பிணக்கு சார்ந்த பகுதியும்
அகதியும் அகதி சார்ந்த பகுதியும்
ஈழ நிலம்
என்றறிக.

கள்ளுக்கடை
கம்யூனிசம்

தாழ்ந்த சாதிக்கென
தனிக்கோப்பை
இங்கில்லை
வீணாய்ப் போன
வருணம் இங்கில்லை

பிச்சைக்காரனுக்குப்
பரிதாபம் இங்கில்லை
தாசில்தாரானாலும்
தனி மரியாதை
என்றில்லை

வாங்கியப் பின்
கழுத்தை திருகி
ஊற்றியப் பின்
உயரம் பார்த்து
சமத்துவம் காத்து

குடித்தப் பின்
குப்புற விழுந்து
முன்பின் தெரியா
முகம் பார்த்து
சிரித்து அழுது

தொடங்குகிறதுப் பேச்சு
ஓட்டு போட்டது முதல்
ஓசோன் ஓட்டை வரை

ஒன்று மட்டும்
புரிகிறது
நீரின்றி அமையாது
உலகு.

அவனவனுக்கு

எப்போதும் புத்தகத்தினூடே
புதைந்து போகும் என்
மீது வருத்தம் பக்கத்து
வீட்டுச் சிறுவனுக்கு
அவன் நினைத்திருக்க
நியாயமில்லை
புத்தகம் சுமை
அல்ல
சுகமென்று.

பிறழ்வு

பேருந்தில்
கவிதைக்குக் கரு
யோசித்தபடியே
பயணிக்கையில்
நிறுத்தம் மாறி
இறங்க
நேர்ந்திருக்கிறது
தவறான நிறுத்தம்
எனினும்
திருப்தியாய்த் தான்
இருக்கிறது எனக்கு
கருக்கலைப்பு
நிகழாததால்.

நிலை

ஏற்றத்தாழ்வு
இல்லாமல்
வாய்ப்பதில்லை
வாழ்க்கை
மந்திரியாவதும்
மாஜியாவதும்
போல.

முரண்

தெய்வத்தான் ஆகாது
எனினும்
ஓட்டு போடு
உனக்கும் கிடைக்கும்
காசு.

இயல்பு

உலுக்காத போதும்
தானாய் விழும்
இலையைப் போல
விரும்பாத போதும்
வந்துத் தொலைக்கிறது
வறுமை.